امریکی گلوکارہ ٹیلر سوئفٹ کے کنسرٹ کے ٹکٹس چوری کر کے دوبارہ فروخت کرنے کے الزام میں دو ہیکرز کو حراست میں لے لیا گیا۔
امریکی میڈیا کی رپورٹ کے مطابق کوئنز کاؤنٹی کے ڈسٹرکٹ اٹارنی کے دفتر نے بتایا کہ 20 سالہ ٹائرون روز اور 31 سالہ شمارا سیمنز کو تقریباً 1 ہزار ٹکٹس چوری کر کے دوبارہ فروخت کرنے کے جرم میں گرفتار کیا گیا ہے۔ رپورٹ کے مطابق دونوں ہیکرز امریکا میں ایک آن لائن ٹکٹ فروخت کرنے والے پلیٹ فارم کے لیے بطور تھرڈ پارٹی کنٹریکٹر کام کر رہے تھے۔
انہوں نے سسٹم میں موجود خامی کا فائدہ اٹھاتے ہوئے کنسرٹ کے ٹکٹس چوری کیے۔ چوری کیے گئے ٹکٹس کو ہیکرز نے 6 لاکھ 35 ہزار ڈالرز (یعنی تقریباً 16 کروڑ پاکستانی روپے) میں دوبارہ فروخت کیا۔ مزید برآں، رپورٹ میں بتایا گیا کہ چوری کیے گئے زیادہ تر ٹکٹس ٹیلر سوئفٹ کے "ایراس ٹور” کے ہیں، تاہم ہیکرز نے ایڈ شیران اور عدیلے کے کنسرٹس کے ٹکٹس بھی چوری کیے تھے۔