ایشوریا اورابھیشیک کا ’’کجرا رے‘‘ پرڈانس، ویڈیووائرل

بالی ووڈ جوڑی نے اپنی بیٹی ارادھیا کے ساتھ پونا میں ایشوریا کے کزن کی شادی میں شرکت کی۔ شادی کی تقریبات سے جاری ہونے والی ویڈیوز اور تصاویر میں جوڑے نے اپنی بیٹی ارادھیا کے ساتھ مل کر اپنے مشہور گانے ’کجرا رے‘ پر ڈانس کیا، جس نے سوشل میڈیا پر تہلکہ مچا دیا۔
یہ یادگار گانا 2005ء میں ریلیز ہونے والی فلم ’’بنٹی اور ببلی‘‘ سے لیا گیا تھا، جس میں ابھیشیک، ایشوریا اور امیتابھ بچن نے پرکشش ڈانس پیش کیا تھا۔ شنکر، احسان، لوی کی موسیقی اور گلزار کے بول والے اس گانے کو الیشا چینائی، شنکر مہادیون اور جاویدعلی نے گایا تھا۔
شادی کی دیگر تصاویر میں جوڑے کو خاندان کے دیگر اراکین کے ساتھ پوز دیتے ہوئے بھی دیکھا جاسکتا ہے۔ اس سے قبل ایشوریا کی کزن شلوکا شیٹی کی پری ویڈنگ تقریبات کی تصاویر بھی وائرل ہوچکی ہیں۔
مداحوں کےلیے یہ لمحات خاص تحفہ ثابت ہوئے، جنہوں نے اپنے پسندیدہ اسٹار جوڑے کو ایک بار پھر ڈانس کرتے دیکھا۔ سوشل میڈیا پر صارفین نے اس خاندانی لمحے کی بے پناہ تعریف کی ہے۔