بھارتی ریاست لکھنؤ میں کسٹمز حکام نے بڑی کارروائی کرتے ہوئے 2 کروڑ 55 لاکھ بھارتی روپے کا سونا دو مسافروں کے پاس سے برآمد کرلیا۔
بین الاقوامی خبر رساں ادارے کی رپورٹ کے مطابق کسٹمز حکام نے دو بڑے مختلف کیسز رپورٹ کیے جو لکھنؤ کے ایئرپورٹ پر پیش آئے۔
کسٹمز حکام نے اس حوالے سے بتایا کہ انہوں نے گزشتہ روز لکھنؤ ایئرپورٹ پر صبح 5 بجے کروڑوں روپے کی اسمگلنگ کی کوشش کو ناکام بنایا ہے۔
میڈیا رپورٹس میں انکشاف ہوا ہے کہ پہلے کیس میں ایک مسافر دبئی سے سونا کافی کی مشین میں چھپا کر منتقل کرنے کی کوشش کررہا تھا، جسے اسکیننگ کے دوران شک کی بنیاد پر چیک کیا گیا تو اس میں سے 3.49 کلو گرام سونا برآمد کرلیا گیا۔
کسٹم حکام کی رپورٹ میں مزید بتایا گیا کہ دوسرا مسافر 554 گرام سونا اپنی بڑی آنت میں چھپا کر شارجہ سے لکھنؤ لے کر آیا تھا جو اسکیننگ کے دوران دھرلیا گیا۔
بھارتی میڈیا کا کہنا ہے کہ دونوں مسافروں سے برآمد کئے گئے کُل سونے کی قیمت بھارتی مالیت میں ڈھائی کروڑ روپے بنتی ہے۔