دفتر خارجہ کے ترجمان ڈاکٹر محمد فیصل نے ایک بیان میں کہا ہے کہ اس سلسلے میں واہگہ لاہور میں منعقد ہونے والا اجلاس خوشگوار ماحول میں ہوا۔ ترجمان نے کہا کہ پاکستان نے ہر روز پانچ ہزار یاتریوں کو اجازت دینے کا فیصلہ کیا ہے جس میں گنجائش کے مطابق اضافہ کیاجائے گا اور یہ سلسلہ انتظامی یا دوسرے معاملات کی بنیاد پر بند رہنے کے سوا سال بھر جاری رہے گا اوربندش کے بارے میں پیشگی اطلاع دی جائے گی۔
انہوں نے کہاکہ پاکستان آغاز میں پیدل سفر کرنے والے یاتریوں کے لئے گزرگاہیں تعمیر کررہاہے۔ انہوں نے کہا کہ پاکستان نے پانچ سو پچاسویں جنم دن کی تقریبات کے بعد دوسرے مرحلے میںایک پل تعمیر کرنے کی بھارتی درخواست پر اتفاق بھی کیا ہے۔دونو ں ممالک کے تکنیکی ماہرین نے مجوزہ راہداری کوجدید خطوط پر استوار کرنے سمیت راہداری کی فنی تفصیلات پربھی تبادلہ خیال کیا۔
پاکستان کے وفد نے پاکستان کے کرتارپور منصوبے کے لئے تعاون کے جذبے اور دوستی کی یاد میں ایک پودا بھی لگایا۔