احتساب عدالت نے سابق وزیر خزانہ اسحاق ڈار کے خلاف اثاثہ جات ریفرنس کی سماعت نیب کے تفتیشی افسر کی عدم حاضری کے باعث بغیر کارروائی کے ملتوی کردی ہے۔
تفصیلات کے مطابق اسحاق ڈار اثاثہ جات ریفرنس کی سماعت احتساب عدالت کے جج محمد بشیر نے کی، ضمنی ریفرنس میں نامزد تینوں ملزمان سابق صدر نیشنل بینک سعید احمد، اور ہجویری ٹرسٹ کے ڈپٹی ڈائریکٹرز نعیم محمود اور منصور رضا عدالت میں پیش ہوئے۔
کیس کے تفتیشی افسر کی عدم حاضری پر نیب کے پروسیکیوٹر افضل قریشی نے بتایا کہ تفتیشی افسر کا ایم ایس سی کا پیپر ہے جس کے باعث وہ آج پیش نہیں ہو سکیں گے۔
جس پر عدالت نے کیس کی سماعت تئیس جولائی تک ملتوی کردی۔